قصيدة ياللي تعيش بهنا
ياللي تعيش بهنا . . حِسْ بشعوري أنا
لمّحت لك ألف مرّه . . و انته و لا انته هنا
جيتك و كلي غرام . . و سمّعتك أحلى الكلام
و انته و لا ملتفت لي . . يا سيدي و الله حرام
طوّلت بالي عليك . . لكن تعبت أرتجيك
مدري أبيك و تبيني . . أو بس أنا اللي أبيك
ياللي العمر ما كفاك . . متى تحس بغلاك
أموت و أعرف حبيبي . .ايش آخرتها معاك
و قصيدة يا صقر
يا هاجسي عطني من أجزل معانيك
و بأصير أنا يا هاجسي كاتبٍ لك
و اعرف ترى بعض البشر ما يقدّيك
بعض البشر ينفعْك لكن يذلّك
أبيك تنخى اللي ليا قام يشفيك
و إليا فعل ما قال أنا فاعلٍ لك
و أبيك تنخى شخص لو ما يحاكيك
إليا سمع بك شي جا فازعٍ لك
نظيف قلب و به حميّا تخليك
تحب راسه لو ماهو شايبٍ لك
هذاك أبو عبدالله و لا فيه تشكيك
هذاك هو اللي أنا ذاخرٍ لك
قل : يا صقر خمسين نعمٍ بطاريك
و خمسين نعمٍ يا صقر في سجلّك
فعلت هذي ما تبي منفعة ذيك
و لا انته بفاعلها لأجل حاجةٍ لك
و لا انته براجي من حدى الناس يعطيك
مير العلوم الغانمة عادةٍ لك
فالمرجلة يا صقر كلٍ يزكيك
حتى الزمن كانه نطق شاهدٍ لك
موضوع: قصيدة ياللي تعيش بهنا و قصيدة يا صقر 
الجمعة يونيو 13, 2008 12:48 pm
