هاك كل القصايد هاك و إقريهن
لا تقولين وش آخرهن وش أولهن
كلهن فدوةٍ لك هاك قوليهن
في لسانك ترى لسانك يجملهن
غيبتك أثرت في حال راعيهن
قطعة أيام عيّا لا يتحمّلهن
بس يمكن ثلاث أيام غبتيهن
لعنبو هالثلاث أيام ما أطولهن
طالعي في فعايلهن و شوفيهن
تحت عيني تبيّن لك فعايلهن
ما هقيت إني أسلم من بلاويهن
بهذلنّي جعل ربّي يبهذلهن
و تهت حتى القصايد قمت أعنيهن
يكملن و أنسى و أعوّد و أكملهن
و المعاني غريبه قمت أنقيهن
عقب ما كنت من قبل أتحايلهن
و قلت ما دامهن جنى برجليهن
بأتشرّط عليهن و آخذ أجملهن
اتركي هالثلاث أرجوك خليهن
سولفي بأي حاجة بنتجاهلهن